ЦХИНВАЛ, 22 июн - Sputnik. Криминалон милицийы наркотиктӕм хъусдарды хайад ӕмӕ Цхинвалы милицийы кусджытӕ ссардтой тобӕгонд наркотикон буарадимӕ зайӕгойтӕ столицӕйы цӕрӕджы хӕдзары, хъусын кӕны Хуссар Ирыстоны Мидхъуыддӕгты министрады (МХМ) пресс-службӕ.
Барадхъахъхъӕнӕг органтӕ ауагътой оперативон-сгарӕн мадзӕлттӕ Цхинвалы цӕрӕджы хисӕрмагонд хӕдзары территорийыл.
"Басгӕрсты рӕстӕджы горӕты 27-аздзыд цӕрӕджы хӕдзары милицийы кусджытӕ ссардтой гӕны цыппар къутӕры. Наркотикон буарадимӕ зайӕгойтӕ арвыстой экспертизӕмӕ", - дзырдӕуы уагдоны хъусинаджы.
Цауы фӕдыл басгӕрст уадзы МХМ Криминалон милицийы наркотиктӕм хъусдарды хайад.