ЦХИНВАЛ, 15 июл — Sputnik, Хъуылымбегты Азӕмӕт. Уӕрӕсеййы иууыл хуыздӕр спортсменкӕ хӕххон альпинизмы классы Оксана Морнева радзырдта, куыд ацыдысты хӕрдмӕсцыдтӕ Европӕ ӕмӕ дунейы бӕрзӕндтӕм, кӕцытӕ нывонд уыдысты номдзыд ирон композитор Дудар Хахановы 100 азы юбилейӕн.
Йӕ ныхӕстӕм гӕсгӕ, маэстройы юбилейы цытӕн цӕгатирыстойнаг альпинисттӕ сӕххӕст кодтой хӕрдмӕсцыдтӕ Эверест, Эльбрус ӕмӕ ӕнӕном бӕрзӕндмӕ, кӕцыйӕн фӕстӕдӕр радтой номдзыд композиторы ном.
Бӕрзӕндмӕ хӕрдмӕсцыды хайад райстой Уалыты Владислав, Хъесаты Тамерлан, афтӕ ма Дудар Хахановы зындгонд ахуыргӕнинаг Плиты Нодар. Хӕрдмӕсцыдӕн баххуыс кодта националон парк Алани, Цӕгат Ирыстоны спорты министрад ӕмӕ ӕрдзон ресурсты фӕдыл раздӕры министр Хыдираты Батрадз.
Афтӕ ма Оксана Морнева снывонд кодта командон хӕрдмӕсцыд Эверестмӕ, кӕцы ацыд ацы аз май-июны, номдзыд композиторы юбилейӕн.
"Нӕ ӕхсӕнадӕмон командӕ сӕххӕст кодта хӕрдмӕсцыдтӕ, кӕцытӕ нывонд уыдысты зындгонд ирон композитор Дудар Хахановы 100 азы юбилейӕн. Йӕ цытӕн 11 майы мах схызтыстӕм Эверестмӕ, 8 июлы Эльбрусмӕ, нӕ ирон ӕмбӕлттӕ та схызтысты ӕнӕном хохмӕ", - загъта Морнева.
Уый банысан кодта, ӕнӕном бӕрзӕндмӕ кӕй схызтысты цыппар адӕймаджы Ирыстонӕй, Дудар Хахановы юбилей хӕрдмӕсцыдӕй банысан кӕнын хъуыды та фӕзынд Хӕмыцаты Хъазбегмӕ – альпинистты командӕйы тренер, ССРЦ спорты мастер.
Дудар Хаханов – советон, ирон ӕмӕ уӕрӕсейаг композитор, скрипач, дирижер ӕмӕ музыкалон-ӕхсӕнадон архайӕг, ахуыргӕнӕг, профессор, аивады зонӕдты кандидат. Уӕрӕсейы советон республикӕйы аивӕдты сгуыхт кусӕг.