ЦХИНВАЛ, 18 июл — Sputnik, Плиты Фатимӕ. Хуссар Ирыстоны 38 ӕрсидтоны цытджын уавӕры ард бахордтой, кӕй хъахъӕндзысты райгуырӕн бӕстӕ.
Церемони ацыд Хъахъхъӕнынады министрады территорийыл.
Ард бахӕрды фӕстӕ ногӕрсидтонтӕн раарфӕ кодта паддзахады разамонӕг Бибылты Анатолий.
"Зынаргъ ӕфсӕддонтӕ ӕмӕ се 'ввахс адӕм, абон ахсджиаг бон у, уымӕн ӕмӕ уӕ бон у уӕ райгуырӕн бӕстӕйӕн балӕггад кӕнад ӕмӕ ма уымӕн дӕр ӕмӕ йӕ бахъуыды кӕндзыстут ӕнустӕм. Ничи дызӕрдыг кӕны, сымах аккаг кӕй равдисдзыстут уӕхи", - загъта президент.
Уый ма бафтыдта, райгуырӕн бӕстӕйӕн удуӕлдай службӕйы дӕнцӕгтӕ ӕрсидтонтӕн бирӕ ис.
Ӕрсидтонты номӕй ӕрӕмбырдуӕвджытӕн бузныджы ныхӕстӕ загъта сӕ иу Куыдзеты Ибрагим. Ӕфсӕддон ныфс радта, кӕй нӕ фӕхудинаг кӕндзысты ирон ӕфсӕддоны ном.
"Ӕз ӕмӕ ма хӕлӕрттӕ абон ард бахордтам. Мах радтам дзырд. Махӕй алчидӕр бахъуыды рӕстӕджы слӕудзӕн йӕ райгуырӕн бӕстӕйы сӕрвӕлтау. Зынаргъ офицертӕ, нӕ уӕ ныххудинаг кӕндзыстӕм. Ныййарджытӕ, бузныг уын нӕ фарсмӕ кӕй стут", - загъта уый.
Ӕрсидтонтӕ ард бахӕрды размӕ рацыдысты цӕттӕдзинады курсытӕ.