ЦХИНВАЛ, 23 июл - Sputnik. Хуссар Ирыстоны парламенты сесси нӕ ацыд кворум кӕй нӕ ӕрӕмбырд, уый тыххӕй. Рабадтмӕ ӕрбацыдысты ӕрмӕстдӕр 19 депутаты.
"Сидын депутатттӕм, цӕмӕй ӕрыздӕхой барадон къабазмӕ ӕмӕ ӕрбацӕуой сессимӕ, уымӕн ӕмӕ мах стӕм адӕмӕй равзаргӕ", - фехъусын кодта ӕрӕмбырдуӕвджытӕн парламенты спикер Тадтаты Алан.
Уый бафтыдта, зӕгъгӕ, кӕцыдӕр депутаттӕ сӕвӕрдтой ультиматум, ома сесси нӕ ацӕудзӕн, кӕд ӕмӕ не ‘ркӕсой уыдон цы кандидатурӕ бахастой ЦӔК сӕргълӕууӕджы бынатмӕ, уымӕ.
Вице-спикер Гасситы Петр банысан кодта, парламент та ногӕй кӕй ис уавӕры, кӕцыйӕ уыдон зынтӕй рахызтысты ацы аз.
Хуссар Ирыстоны парламенты президиум майрӕмбоны рахаста сессимӕ президенты куырдиат Гӕджиты Эмилияйы кандидатурӕйы фӕдыл ЦӔК разамонӕджы бынатмӕ. Афтӕ ма сессийыл хъуамӕ ӕркастаиккой ЦӔК ног скондмӕ, кӕцымӕ бахызтысты фӕйнӕ авд минӕвары президент ӕмӕ парламентӕй.
Уымӕй дарддӕр рабадтыл нывӕндысты ӕркӕсын вейп-продукцийыл тобӕ сӕвӕрын Хуссар Ирыстоны территорийыл ӕмӕ ивындзинӕдтӕм Таможнӕйон кодексмӕ.
Амӕйразмӕ парламент нӕ уагъта сессимӕ фарон сентябрӕй 2021 азы 16 февралы онг депутатты къорд бойкот кӕй расидт, уый тыххӕй. Уыдон домдтой Дзабиты Иналы мӕлӕты раст фӕдагуырд ӕмӕ генпрокуроры отставкӕ.