ЦХИНВАЛ, 7 сен — Sputnik, Хъуылымбегты Зӕлинӕ. Цӕгат Ирыстоны Национ музейы равдыстон залы ацӕудзӕн Хуссар ӕмӕ Цӕгат Ирыстоны сгуыхт нывгӕнӕг Кацты Вадим ӕмӕ хуссарирыстойнаг скульптор Кӕсӕбиты Андрейы куыстыты равдыст.
"Равдыстмӕ рахӕсдзӕн мӕ зӕронд куыстытӕ, кӕцытӕ уӕй кӕнынӕн нӕ арӕзтон. Сӕрмагондӕй равдыстӕн ног куыстытӕ нӕ сарӕзтон, уымӕн ӕмӕ ӕз уарзын фӕлдисын сӕрибар тыгъдады, ӕнӕ исты фӕлгӕттӕй", - загъта Кӕсӕбиты Андрей.
Экспозицийы фенӕн уыдзӕн скульпторы 20 куыстӕй фылдӕр, кӕцытӕ конд сты хъӕдӕрмӕгӕй.
Уымӕй фылдӕр куыстытӕ ма равдыстмӕ рахӕсдзӕн ирон нывгӕнӕг Кацты Вадим дӕр.
Нывкӕнынад ӕмӕ скульптурӕйы равдыст Цӕгат Ирыстоны сӕйраг горӕты байгом уыдзӕн 10 сентябры 16:00 сахатыл ӕмӕ адарддӕр уыдзӕн 30 сентябрьмӕ.