ЦХИНВАЛ, 6 сен — Sputnik, Плиты Фатимӕ. Хуссар Ирыстоны дзулфыцӕн комбинаты кусджыты къордӕн амалиуӕгады разамынад рахицӕн кодта премитӕ.
Фӕйнӕ дыууӕ мин сомы райстой 2008 азы хӕсты рӕстӕджы рауагъдады чи куыста, фондз минтӕ та райстой скъоладзауты ныййарджытӕ.
"Дзулфыцӕн комбинаты сӕйраг ӕмӕ кондитерон цехты кусджытӕй хӕсты рӕстӕджы чи фыдӕбон кодта, уыдон рахицӕн кодтам ӕхцайы премитӕй Уӕрӕсейы 'рдыгӕй Хуссар Ирыстоны хӕдбардзинад банымады бонмӕ. Уыдон райстой фӕйнӕ 2 мин сомы. Ноджы ма фӕйнӕ фондз мины та райстой, нӕ кусджытӕй скъолайы кары зӕнӕг кӕмӕн ис, уыдон ног ахуыры азмӕ", - загъта комбинаты хистӕр Цхуырбаты Вадим.
Амалиуӕгады разамонӕг ма бафтыдта, ӕдӕппӕтӕй премитӕ кӕй аххӕссыдысты 70-йӕ фылдӕр адӕймагыл.