ЦХИНВАЛ, 11 окт - Sputnik. Хуссар Ирыстоны премьер-министр Бекъойты Геннадий ӕрдзырдта профессор Кортиаты Леванимӕ Транскавказаг автомагистралы музей саразыны фарстыл.
Цӕгат Кавказы хӕххон-металлургон институты Транскамы музей
© Пресс-служба правительства РЮО
Кортиаты Леван у фӕндагон змӕлды ӕдасдзинад ӕмӕ организацийы кафедрӕйы профессор ӕмӕ Транскамы музейы бындурӕвӕрӕг Цӕгат Кавказы хӕххон-металлургон институты.
Хуссар Ирыстоны хицауады сӕрдар ӕрзылд музейы экспозицийыл институты проректор Гудиты Тимуримӕ. Музейы коллекцийы ис ӕрмӕджытӕ, кӕцытӕ Кортиаты Леван ӕмбырд кодта 50 азы дӕргъы – экипировкӕ, инструменттӕ, арӕзтады нывӕзтытӕ ӕмӕ ӕндӕртӕ.
Кортиаты Леван бахахх кодта, раздӕр дӕр бирӕ хатт кӕй бадзырдта ацы хъӕппӕрисимӕ республикӕйы къухдариуӕгадмӕ, фӕлӕ ӕрмӕст ныр райста Хуссар Ирыстоны сӕргълӕууӕджы разыдзинад.
"Автомагистралы фӕзындӕн, кӕцы иу кӕны ирон адӕмы хуссар ӕмӕ цӕгаттаг хай, ис ахсджиаг нысаниуӕг. Раст уыдзӕн, Транскамы историйӕн нывонд музей куы уа Хуссар Ирыстоны дӕр. Ахсджиг у зонын хъайтарты, кӕцытӕ бындур ӕрӕвӕрдтой "царды фӕндаджы" арӕзтадӕн. Дарддӕр кусдзыстӕм фарстытыл, кӕцытӕ баст сты музейы арӕзтадимӕ", - банысан кодта Бекъойты Геннадий.
Кортиаты Леван ма радзырдта музейы уазджытӕн, йӕ бӕллиц кӕй у саразын ӕфсӕнвӕндаг Кавказы хӕхты рагъы уылты.