ЦХИНВАЛ, 18 ноя – Sputnik, Козаты Диана. Арӕнгӕрон территорийыл цӕрӕг пункт Эргнеты районы уагъд цӕуы Инциденттӕ ма руадзын ӕмӕ сӕ аиуварс кӕныны фӕдыл механизмты (ИӔАМ) хайадисисджыты радон фембӕлд.
ИӔАМ форматы хайадисджытӕ фембӕлдысты ныр 103-ӕм хатт, фӕстаг фембӕлд ацыд сентябры кӕрӕтты.
Президенты ӕххӕстбарджын минӕвары аппараты куыд фехъусын кодтой, афтӕмӕй боны фӕткы ис ӕрдзурын инциденттыл, кӕцытӕ ӕрцыдысты паддзахадон арӕныл фӕстаг фембӕлдӕй фӕстӕмӕ, гуманитарон фарстытӕ, афтӕ ма хуссарирыстойнаг хъӕу Уисты уавӕр, цы ран гуырдзиаг полици сӕвӕрдта ӕнӕзаконон блокпост.
Фембӕлды хатдзӕгтыл радзурдзӕн хуссарирыстойнаг делегацийы сӕргълӕууӕг Коцты Егор.
ИӔАМ форматы фембӕлдтӕ уагъд цӕуынц 2009 азӕй фӕстӕмӕ. Хайад сӕ райсынц Хуссар Ирыстон, Уӕрӕсе ӕмӕ Гуырдзыстоны минӕвӕрттӕ, афтӕ ма ОБСЕ ӕмӕ Евроцӕдисы ӕхсӕнылӕгтӕ.