ЦХИНВАЛ, 6 дек – Sputnik, Тъехты Дзерассӕ. Хуссар Ирыстоны ног кусӕгон къуыри райдыдта фӕндагон-транспортон цауӕй (ФТЦ) республикӕйы столицӕйы. Цхинвалы Горький ӕмӕ Гаглойты Владимиры уынгты алвӕндагыл сӕмбӕлдысты хӕдтулгӕтӕ Toyota Camry ӕмӕ ВАЗ-2106.
Мидхъуыддӕгты министрады (МХМ) пресс-слубӕйы кусӕг Джиоты Алик куыд фехъусын кодта Sputnik, афтӕмӕй аварийы фӕстиуӕгӕн ничи бахъыгдард.
"Ныртӕккӕ уагъд цӕуы административон фӕдагуырд, бӕрӕг кӕнынц ФТЦ ӕууӕлтӕ", - загъта уагдоны минӕвар.
Амӕйразмӕ МХМ фехъусын кодтой, Хуссар Ирыстоны азы кӕронмӕ кӕй нывӕндынц балхынцъ кӕнын "Ӕдас горӕты" дыккаг этап, кӕцы аххӕсдзӕн ӕппӕт республикӕйыл. Проекты фӕлгӕтты Цхинвалы сӕвӕрдзысты 80 видеокамерӕйӕ фылдӕр.