ЦХИНВАЛ, 9 дек — Sputnik, Плиты Фатимӕ. Хуссар Ирыстоны ноджы ӕртӕ скъола ӕмӕ иу сабидоны бакодтой карантин, фехъусын кодта ахуырады министрады кусӕг Бекъойты Елена.
"Майрӕмбонӕй карантиныл сӕхгӕндзысты Кадетон скъола, Цхинвалы ӕхсӕзӕм скъола, афтӕ ма Дзауы районы Гуфтайы скъола ӕмӕ сабидон. Йӕ аххосӕгтӕ сты грипп ӕмӕ КРВИ, коронавирусӕй рынчынтӕ ацы уагдӕтты нӕй", - загъта министрады минӕвар.
Карантин архайдзӕн 19 декабрьмӕ.
Ацы къуыри ма грипп ӕмӕ КРВИ-йы аххосӕй ахуырдон процесс ӕрурӕдтой Цхинвалы фыццаг ӕмӕ 11-ӕм скъолаты, Аивӕдты лицейы ӕмӕ Цхинвалы скъола-интернаты.