ЦХИНВАЛ, 1 янв - Sputnik, Плиты Фатимӕ. Хуссар Ирыстон хорз бахъахъхъӕдта йӕ традицитӕ уӕззау уавӕртӕм ӕнӕкӕсгӕйӕ, сӕ нымӕцы ногазон ӕгъдӕуттӕ, фӕлӕ абон фылдӕр нысан кӕны европӕйаг уагмӕ гӕсгӕ, радзырдта Sputnik ахуыргонд, политолог Гаглойты Ирина.
"Ирон адӕмы ӕмбарынады ног азӕй ахсджиагдӕр уыд ног бон. Ног азы ног бонмӕ цӕттӕ цыд алцыдӕр ногӕй. Мӕ нана иу хуры скастимӕ сыстад ӕмӕ цӕттӕ кодта ног хӕринаг, дзыкка - ӕнӕмӕнг дзы хъуамӕ уыдаид дзадджын сойджын хӕринаг. Сабитӕн хӕрын кодта мыд", - радзырдта Гаглойты Ирина.
Уый ма бафтыдта, ацы бӕрӕгбонмӕ алы бинонтӕ ӕрцӕттӕ кӕнынц уӕливыхтӕ.
"Абон мах цы ног аз нысан кӕнӕм, уый ирон ног аз нӕу, фӕлӕ дзы ӕрфидар ис ирон ӕгъдӕуттӕ дӕр", - загъта уый.
Ахуыргонд ма традицитӕй дарддӕр ӕрдзырдта йӕхи мысинӕгтыл дӕр.
"Ӕртхурон дӕр хъӕуы кӕнын Ног азмӕ. Уымӕн ӕмӕ 14 нымӕцӕй мах кад кӕнӕм ӕрмӕст зӕронд къӕлиндарӕн. Стӕй ма мӕ нана ног азы къӕсӕрыл ӕмбисӕхсӕв соййӕ дзуар ныххах кӕны сусӕгӕй. Стӕй ма-иу миты бынӕй систа сындзытӕ ӕмӕ сӕ кодта хӕдзары ӕрбахизӕнты, афтӕмӕй сӕ ӕмбарынады хъахъхъӕдтой сӕ хӕдзар", - бафтыдта Гаглойты Ирина.
Уый ма ӕрӕмысыд, ног азмӕ ма кодтой басылтӕ - адджинӕгтӕ цӕрӕгойты хуызы.
Ахуыргонд ма бафтыдта, ирон ног бон нысан цыд ӕхсӕнадӕй, ӕрмӕст бинонты бӕрӕгбон нӕ уыд.