ЦХИНВАЛ, 18 янв - Sputnik, Плиты Фатимӕ. Хуссар Ирыстоны паддзахадон драмон театры 20 ӕмӕ 21 январы ацӕудзӕн геноциды тыххæй спектакль "Фӕстаг ӕвдисӕн"-ы премьерон равдысттæ. Дыццӕджы райсом билеттӕ фӕзындысты кассӕты, фехъусын кодтой Sputnik ПДТ пресс-службæйы.
Уымӕй размӕ спектакль рахастой æхсæнадон æмæ аивадон советты æркастмæ.
"Спектаклыл куыст цыд иу аз ӕмӕ ӕрдӕгӕй фылдӕр, нысангонд уыд геноциды сӕдӕ азмӕ, фӕлӕ иумӕйаг эпидемиологон уавӕры тыххӕй ныффӕстиад", - загътой уым.
Спектаклы ӕдӕппӕт архайы 60 адӕймаджы - алкӕцы дӕр дзы йӕхи бынаты ӕххӕст кӕны сӕрмагонд хӕс ӕмӕ нысаниуӕг. Гуырахстджын спектаклы театры труппӕйӕ дарддӕр архайынц театралон факультеты студенттӕ ӕмӕ ахуырдзаутӕ.
Спектакль "Фӕстаг ӕвдисӕн"-ы уацмыс ныффыста Остъаты Алан 2019 азы ирон адӕмы геноциды сӕдӕ азы юбилеймӕ. Спектакль бацӕттӕ кӕнын нӕ бантыст юбилейон датӕмӕ, республикӕйы сӕвзӕргӕ эпидемиологон уавӕры аххосӕй.
Трагеди ӕвдисы 1920 азы июны цауты тыххӕй - уӕд Гуырдзыстон ӕрӕвнӕлдта ирон адӕмӕн геноцид аразынмӕ.