ЦХИНВАЛ, 21 янв — Sputnik, Плиты Фатимӕ. Хуссар Ирыстоны ӕхсӕз астӕуккаг скъолайы ӕмӕ иу сабидоны бакодтой карантин, ноджы ма къорд ахуырадон уагдоны сӕхгӕдтой хицӕн кълӕстӕ, фехъусын кодтой Sputnik ахуырады министрады.
Фӕстаг бонты санитарон службӕты официалон статистикӕмӕ гӕсгӕ, Хуссар Ирыстоны сбирӕ сты коронавирусӕй рынчынты нымӕц, уыимӕ иумӕ апарахат ис сезонон грипп дӕр.
"21 январӕй 30 январьмӕ сӕ куыст ӕрурӕдтой 11-ӕм скъола, Цхинвалы скъола-интернат ӕмӕ Знауыры астӕуккаг скъола. Ацы ӕмгъуыд карантин бакодтой Дзауы скъолайы ӕмӕ Дзауы скъола-интернаты ӕмӕ Къостайы хъӕуы астӕуккаг скъолайы. Горӕт Цхинвалы 10-ӕм сабидон дӕр ӕрцыд ӕхгӕд", - загътой уагдоны.
Ног къуырийы ма карантин архайдзӕн горӕты ӕмӕ районты сабидӕттӕ ӕмӕ скъолаты хицӕн кълӕстӕ ӕмӕ къордты.
"Фыццӕгӕм, ӕртыккаг, фӕндзӕм ӕмӕ "Эрудит"-ы скъолаты сӕхгӕдтой хицӕн кълӕстӕ. Фыццӕгӕм, 11-ӕм ӕмӕ Къостайы хъӕуы та сабидӕтты хицӕн къордтӕ", - бафтыдтой уым.
Уымӕй размӕ ма ахуырадон процесс ӕрурӕдтой Кадетты скъолайы ӕмӕ гимнази "Альбион"-ы