ЦХИНВАЛ, 18 фев - Sputnik. Хуссар Ирыстоны Уӕлвӕткон уавӕрты министрады майдантӕй "Уӕлвӕткон цауты фӕстиуджытӕ иуварс кӕныны расгуыхыны тыххӕй" схорзӕхджын кодтой Цӕгат Ирыстоны ирвӕзынгӕнӕн службӕты кусджыты, кӕцытӕ ӕххуыс кодтой 1991 азы Дзауы районы Хахеты хъӕуы зӕххӕнкъуысты фӕстӕ адӕмы ферфӕзын кӕныны ӕмӕ ӕрдзон бӕллӕхы фӕстиуджытӕ аиуварс кӕныны хъуыддаджы. Уый тыххӕй майрӕмбоны хъусын кӕны уагдоны пресс-службӕ.
Хуссар Иры УУМ майдантӕй схорзӕхджын кодтой цӕгатирыстойнаг ирвӕзынгӕнджыты
© Пресс-служба МЧС РЮО
Зӕххӕнкъуыст ӕрцыд 1991 азы 29 апрелы. Йӕ эпицентр 9 баллы магнитудӕйы уыд Дзауы районон центры цур. Поселок ныппырх, Хахеты хъӕу та ацыд зӕххы бын йӕ 42 цӕрӕгимӕ иумӕ. Зӕххӕнкъуысты амӕттӕгтӕ ӕдӕппӕт баисты 59 адӕймаджы, уыдонӕй 21 уыдысты сывӕллӕттӕ.
Цӕгатирыстойнаг ирвӕзынгӕнджытӕн, кӕцытӕ уыцы уӕззау бонты ӕрбалӕууыдысты сӕ хуссайраг ӕфсымӕрты фарсмӕ, радтой майдантӕ стыр хъӕбатырдзинад ӕмӕ удуӕлдай архайды тыххӕй.
Хуссар Иры УУМ майдантӕй схорзӕхджын кодтой цӕгатирыстойнаг ирвӕзынгӕнджыты
© Пресс-служба МЧС РЮО
Коллегӕты хорзӕхджын кодтой РХИ УУМ сӕргълӕууӕг Цоциты Азӕмӕт, министры хӕдивӕг Бестауты Ацӕмӕз ӕмӕ агурӕн-ирвӕзынгӕнӕг къорды сӕргълӕууӕг Дмитрий Марданов.
Хорзӕхтӕ райстой Тауаситы Руслан, Игорь Зайвенко, Вячеслав Александрович, Юрий Парахневич, Виктор Безяев, Николай Богинский ӕмӕ Вячеслав Волков.