ЦХИНВАЛ, 25 фев - Sputnik, Плиты Фатимӕ. Хуссар Ирыстоны Знауыры районы ӕрнывыл ис африкӕйаг емынӕимӕ уавӕр, фехъусын кодта Sputnik районы сӕйраг ветеринарон дохтыр Хъотайты Ӕхсар.
Ивгъуыд мӕйы Знауыры районы Хъорнис ӕмӕ Фарны хъӕуты апарахат ис африкӕйаг емынӕ. Уый ныццагъта дӕсгай хуытӕ ацы хъӕуты. Низ сбӕлвырд кодтой Краснодары Кропоткины лабораторийы ахуырты руаджы.
"Уавӕр у стабилон, ныр ӕртӕ къуыри Знауыры районы африкӕйаг емынӕйӕ нал мӕлынц хуытӕ. Низы апарахат ӕрурӕдтам", - радзырдта ветеринар.
Уавӕр ӕрнывыл кӕнынӕн фӕахъаз сты хъӕутӕм бацӕуӕны цы дезбарьертӕ сӕвӕрдтой, уыдон, банысан кодта фосы дохтыр.
"Ӕдӕппӕтӕй дзы сӕвӕрдтам фондз, уыдонӕй дыууӕ посёлочы, фӕйнӕ та Хъорнис, Мугут ӕмӕ Фарны хъӕутӕм бацӕуӕны. Уый ӕмӕ ӕндӕр мадзӕлтты фӕрцы хуытӕ нал мӕлынц", - бафтыдта Хъотайты Ӕхсар.
Знауыры районы фӕстаг рӕстӕджы африкӕйаг емынӕйӕ парахат ис ныр цалдӕр хатты.