ЦХИНВАЛ, 24 мар фев - Sputnik, Плиты Фатимӕ. Цхинвалы йӕ скуыст срӕвдз кодта Уӕрӕсейы федералон таможнӕйон службӕйы Хуссар Ирыстоны фадыг, фехъусын кодта Sputnik посты хистӕр Евгений Леонов.
Пост нырма кусы арӕнӕвӕрд режимы. Фыццаг рады уал ам лыг кӕндзысты сӕ баласт цы хӕдтулӕтӕн нӕу ӕхгӕд, уыдоны фарст.
"Цхинвалы скуыста Уӕрӕсейы таможнӕйон службӕйы сӕрмагонд пост. Хайады фӕрцы нырма скъуыддзаг цӕудзысты ӕрмӕстдӕр Уӕрӕсемӕ хӕдтулгӕты баласт сӕхгӕныны фарстытӕ", - загъта уый.
Уыдон нымӕцмӕ хауы, Уӕрӕсейы таможнӕйон органты Иугонд автоматизацигонд информацион системӕйы хицӕн аххоссӕгтӕм гӕсгӕ цы хӕдтулгӕты ӕрыздӕхты фӕдыл нӕй бӕрӕггӕнӕнтӕ, ахӕмтӕ дӕр.
Нырмӕ кӕд ахӕм проблемӕйы скуыддзагмӕ ӕнхъӕлмӕ кастысты къуыригай, уӕд ныр та цалдӕр бонмӕ лыг цӕуынц. Евгений Леоновы ныхӕстӕм гӕсгӕ, нырмӕ ацы фарст уыд Хуссар Ирыстоны таможнӕйы комитеты бӕрны, уыдон сӕ скъуыддзаг кодтой сӕ уӕрӕсейаг коллегаты фӕрцы.
"Пост нырма цӕуы фидаргонд, бахъӕудзӕн рӕстӕг, цӕмӕй кусджыты ӕрӕрвитой ӕмӕ программӕ ныббинноныг кӕной", - бафтыдта уый.
Нырма ӕххӕст гуырахстӕй кӕд скусдзӕн пост, уый бӕрӕг нӕу, фӕлӕ ам бынаты саразӕн уыдзӕн баласты гӕххӕттытӕ дӕр.
Уымӕй размӕ паддзахады разамонӕг Бибылты Анатолий фехъусын кодта, ӕввахс рӕстӕджы Уӕрӕсейы территоримӕ хӕдтулгӕты баласты документтӕ гӕнӕн кӕй уыдзӕн саразын Цхинвалы развӕлгъау. Уый фӕстӕ ацы хабар сбӕлвырд кодта Хуссар Ирыстоны таможнӕйы хистӕр Цхуырбаты Мурат дӕр.
Уӕрӕсейӕг федералон таможнӕйон службӕйы сӕрмагонд пост Цхинвалы кусы Хуссар Ирыстоны таможнӕйы комитеты бӕстыхайы фыццаг уӕладзыджы.