ЦХИНВАЛ, 30 мар – Sputnik, Тъехты Дзерассӕ. ХИПУ къухдариуӕгад 30 марты бафыста бадзырд Коммуникациты райрӕзты националон иртасӕн институты зонадон журналты бынӕттон ахуыргӕндты куыстытӕ мыхуыр кӕныны фӕдыл, фехъусын кодта институты зонадон куысты фӕдыл директоры хӕдивӕг Валентина Комлева Sputnik пресс-конференцийы рӕстӕджы.
Институты делегаци ӕрцыд Хуссар Ирыстонмӕ къуырисӕры. Республикӕйы уазджытӕ ауагътой цалдӕр ахуырадон мадзалы ӕмӕ тымбыл фынгтӕ. Фӕлӕ балцы сӕйраг нысаниуӕг уыд Коммуникациты райрӕзты националон иртасӕн институт ӕмӕ республикӕйы президенты администрацийы хсӕн бадзырд.
Комлева банысан кодта, хуссарирыстойнаг ахуыргӕндты куыстытӕ кӕй мыхуыр кӕндзысты зонадон журнал "Россия и мир: научный диалог"-ы.
"Журнал цӕуы уырыссаг ӕмӕ англисаг ӕвзӕгтыл. Уый фадат ратдзӕн Хуссар Ирыстоны ахуыргӕндтӕн сӕ хъуыдытӕ хӕццӕ кӕнын англисаг ӕвзагыл дзурӕг экспертон аудиторимӕ", - фехъусын кодта институты минӕвар.
Уый бафтыдта, зӕгъгӕ, ХИПУ базӕйыл нывӕндынц ауадзын семинартӕ, кӕцыты фӕстӕ дӕтдзысты сертификаттӕ кӕнӕ документтӕ уӕлӕмхас ахуырад фӕуыны фӕдыл. Афтӕ ма сентябры ацӕудзӕн ХИПУ ӕмӕ Коммуникациты райрӕзты националон иртасӕн институты иумӕйаг конференци.
Валентина Комлева
© Sputnik / Natalia Airiyan
Комлева ма радзырдта, знон кӕй ауагъта ХИПУ-йы гом лекци фӕсивӕд ӕмӕ студенттӕн, кӕцыйы рӕстӕджы радзырдта институт цы зонадон иртӕстытӕ ӕмӕ проекттӕ нывӕнды, уыдон тыххӕй.
"Хуссар Ирыстон хизы йӕ райрӕзты ног ӕмвӕзадмӕ, хъуыды кӕны йӕ фидӕныл, кӕцы баст у инновацитимӕ, зонадимӕ ӕмӕ кадрон потенциалимӕ", - бахахх кодта директоры хӕдивӕг.
Коммуникациты райрӕзты националон иртасӕн институт у ӕхсӕнпаддзахадон ӕмӕ ӕхсӕнкультурон коммуникациты анализы методологийы арӕзтады центр.