ЦХИНВАЛ, 19 май – Sputnik, Тъехты Дзерассӕ. Цхинвалы цыппӕрӕмы райдыдтой ерыстӕ уӕлыстол теннисӕй ӕрыгӕтты хсӕн. Турнир уагъд цӕуы столицӕйы спортивон скъолайы, хайад дзы исынц 25 ӕвзонг теннисисты.
Уӕлыстол теннисы тренер Остъаты Лидия куыд радзырдта Sputnik, афтӕмӕй сывӕллӕттӕ кӕрӕдзиимӕ хъаздзысты зылдон системӕмӕ гӕсгӕ.
Ерыстӕ уӕлыстол теннисӕй
© Sputnik / Дзерасса Техова
"Бирӕ хайадисджытӕ нӕм ис, фӕлӕ мах хъуамӕ абон фӕуӕм ерыстӕ", - фехъусын кодта уый.
Тренер радзырдта, турниры хайад кӕй исынц 2007-2011, 2012-2013 ӕмӕ2014 азты гуырд спортсментӕ. Теннисисттӕй иуыл кӕстӕрдӕр у 2015 азы гуырд.
"Нальчикы 26 майы цӕудзысты Цӕгат Кавказы федералон зылды ерысты уӕлыстол теннисӕй "Шаг в будущее". Ацы турнирмӕ ацӕудзысты 2011 азы гуырд чызджыты хсӕн фыццаг ӕмӕ дыккаг бынӕттӕ чи бацахса, уыдон", - загъта Остъаты Лидия.
Абоны ерысты уӕлахиздзауты схорзӕхджын кӕндзысты грамотӕтӕ ӕмӕ майдантӕй.