ЦХИНВАЛ, 1 июл — Sputnik. Хуссар Ирыстоны райдыдтой фæлварæнтæ республикæйы абитуриенттæн, кæцытæ цæуынц Уæрæсейы Мидхъуыддæгты министрады (МХМ) ахуыргæнæндæттæм, хъусын кæны барадхъахъхъæнæг уагдоны пресс-службæ.
Уагдоны банысан кодтой, Уæрæсейы МХМ ахуыргæнæндæттæм бацæуынмæ куырдиæттæ кæй бадæттой 55 адæймаджы, уыдонæй 18 нæ рацыдысты республикæйы МХМ æмæ ПÆК басгæрст, афтæ ма психодиагностикон иртæст æмæ медицинон къамис. Физикон цæттæдзинады фæлварæнмæ бауагътой 36 абитуриенты – нормативтæ ацыдысты республикон стадионыл.
Хуссар Иры райдыдтой фæлварæнтæ Уæрæсейы МХМ ахуыргæнæндæттæм
© Пресс-служба МВД РЮО
"Лæппутæ сæхи хъуамæ систаиккой уæладзæныл 12 хатт æмæ алыгъдаиккой 3 километры 13 минут 20 секундмæ. Чызджытæ та 100 метр хъуамæ алидзой 18 секундмæ æмæ километрон кросс та 4 минут 35 секундмæ", - дзырдæуы хъусинаджы.
Фæлварæнтæ истой ХИПУ физикон хъомылады факультеты ахуыргæнджытæ. Сæ цæст сæм дардтой исæн къамисы уæнгтæ, МХМ медиктæ æмæ ибитуриентты ныййарджытæ.
Нысангонд æрцыд, нормативты фæстæ абитуриенттæн ацæудзысты фæлварæнтæ уырыссаг æвзаг, истори æмæ дзыллæзонадæй.