ЦХИНВАЛ, 7 июл — Sputnik, Гæбæраты Элина. Хуссар Ирыстоны президент Гаглойты Алан бавдыста Цхинвалы администрацийæн ног разамонæг Бæззаты Иналы.
Бæззаты Иналы снысан кæнын фæдыл барамынд бафыста паддзахады сæргълæууæг 28 июны. Церемони ацыд районон администрацийы бæстыхайы.
"Сымах иууылдæр зонут Бæззаты Иналы. Алы рæстæджы дæр йæхи иттæг хорз æвдыста. Уырны мæ, хорз æмархайд кæй кæндзæн районы цæрджытимæ. Цæй æмæ йын иууылдæр баххуыс кæнæм Цхинвалы районы хæрзæбонæн", - загъта президент администрацийы кусджытæн.
Президент бахахх кодта, абоны бон уæлдай хъусдард кæй хъæуы аздахын хъæуты цæрджытæм.
Паддзахады сæргълæууæг бузныг загъта районы администрацийы раздæры разамонæг Мамытаты Вахтангæн дæр йæ куысты тыххæй.
Бæззаты Инал фидарæй загъта президент æмæ йæ ног коллективæн, алцыдæр кæй араздзæн районы размæцыдæн.
"Мах нæ тæрсæм куыстæй. Алыхатт дæр хъæуы хъуыды кæнын, куысты бынæттæ рæстæгмæ кæй вæййынц, махимæ баззайы æрмæстдæр хорздзинад, кæцы сарæзтам нæ куысты рæстæджы" – банысан кодта Бæззаты Инал.
Цыбыр биографи
Бæззаты Инал райгуырд 1974 азы Цхинвалы. Фæцис Цхинвалы пединституты физикон хъомылады факультет, уый фæстæ куыста Цъунары паддзахадон хæдзарады.
2004 азæй фæстæмæ – РХИ Хъахъхъæнынады министрады батальонтæй иуы командæгæнæг.
РХИ парламенты цыппæрæм æмæ фæндзæм æрсидты депутат.
Хорзæхджын æрцыд Хуссар Ирыстоны паддзахадон хорзæхтæй, сæ нымæцы иууыл бæрзонддæр æфсæддон хорзæх – Уацамонгæйы орден.