ЦХИНВАЛ, 8 авг — Sputnik. Хуссар Ирыстоны барадхъахъхъæнæг органтæ ивгъуыд къуыри срегистраци кодтой æртæ фыдракæнды, кæцытæ раргом кодтой мидхъуыддæгты органтæ. Уый тыххæй къуырисæры хъусын кæны республикæйы Мидхъуыддæгты министрады (МХМ) пресс-службæ.
Афтæ ма Цхинвалы мидхъуыддæгты дæлхайады кусджытæ бæрнмæ æрбаздахтой æртæ адæймаджы – уыдонæн иууылдæр рахастой административон æфхæрдтæ.
Фæндæгтыл уавæр
Фыццæгæмæй æстæм августмæ республикæйы фæндæгтыл æрцыд фондз фæндагон-транспортон цауы (ФТЦ). Авариты фæстиуæгæн алыхуызон цæфтæ райстой дыууæ адæймаджы, уыдонæй иу – саби.
Уагдоны ма бафтыдтой, зæгъгæ, Паддзахадон автоинспекцийы кусджытæ сбæрæг кодтой фæндагон змæлды 352 фæткхалды. Авд шофыры фæдыл сарæзтæуыд административон протоколтæ автотранспорт нозтджынæй скъæрыны тыххæй.