ЦХИНВАЛ, 12 авг - Sputnik, Плиты Фатимӕ. Хуссар Ирыстоны ныгуылӕн фарс столицӕмӕ ӕрбахизӕны Хетӕгкаты Къостайы хӕстӕфхӕрд панно чи сараза, ахӕм специалисттӕ нӕй республикӕйы, фехъусын кодта Sputnik Цхинвалы районы администрацийы хистӕр Бӕззаты Инал.
Алюминийӕ конд панно ӕвӕрд ӕрцыд 38 азы размӕ Хетӕгкаты Къостайы радон юбилеймӕ. Уый фӕстӕ рӕстӕг ӕмӕ хӕстон архӕйдтытӕ ныууагътой ууыл дӕр сӕ фӕд. Кӕцыдӕр фрагменттӕ цыртӕй бынтондӕр рахаудтой, аннӕтӕ сты нӕмыджы фӕдтимӕ.
Хетӕгкаты Къостайы панно
© Фатима Плиева
Ӕмткӕй цырт ис ӕнӕркаст уавӕры, йӕ бындур пыхсӕй нал зыны. Панно цы бынаты ис, уый хауы Цхинвалы районы территоримӕ.
"Цырт у сӕрмагонд техникӕйы арӕзт, ныридӕгӕн Хуссар Ирыстоны нӕй специалисттӕ, кӕцытӕ зонынц ахӕм куыст. Уавӕр хынцгӕйӕ, ӕвӕццӕгӕн, бахъӕудзӕн уый бынтондӕр айсын, йӕ сӕндидзын кӕнынӕн амал кӕй нӕй, уымӕ гӕсгӕ", - загъта районы разамонӕг.
Панно лӕууы трассӕгӕрон. Ӕхсӕзметрон цыртӕн йӕ хӕйттӕ дӕр ӕппӕт йӕ уӕлӕ нал сты. Хетӕгкаты Къостайы хуызистӕй дарддӕр ма ам уыд йӕ уацмысты сюжеттӕ, нывты репродукцитӕ ӕмӕ ирон арнаменттӕ.