ЦХИНВАЛ, 17 авг - Sputnik, Плиты Фатимӕ. Хуссар Ирыстоны паддзахадон драмон театр равдисдзӕн музыкалон спектакль "Пӕсӕйы фӕндон" Ленингор ӕмӕ Цъинагары. Равдысттӕ нысан сты ацы къуыримӕ, фехъусын кодтой Sputnik ПДТ пресс-службӕйы.
Паддзахадон театры сценӕйыл комедийы премьерон равдысттӕ уыдысты уалдзӕджы, уый фӕстӕ ма "Пӕсӕйы фӕндон" равдыстой хӕрзаудӕн нысанӕн дӕр. Сӕрдыгон улӕфты ацыды размӕ спектакль ахастой Дзау ӕмӕ Дменисмӕ.
"Пӕсӕйы фӕндон" 17 августы авд сахатыл ӕвдисдзыстӕм Цъинагары цӕрджытӕн, 19 августы та йӕ хӕссӕм Ленингормӕ", - загътой уагдоны.
Режиссер Цӕриаты Валерийы ӕвӕрд спектаклы хъазынц Гӕджиты Инга, Хаситы Сослан, Уанеты Эдуард, Мӕргъиты Инга, Чохели Натия, Гаглойты Артур ӕмӕ ӕндӕртӕ.
Туаты Дауыты пьесӕ "Пӕсӕйы фӕндон" у национ драматургийы классикӕ. Ӕвӕрд ӕрцыд цалдӕр хатты Дзӕуджыхъӕуы Ирон Театры сценӕйыл – ивгъуыд ӕнусы 50-ӕм ӕмӕ 90-ӕм ӕзты. Уыд Хуссар Ирыстоны театры репертуары дӕр.