ЦХИНВАЛ, 25 авг – Sputnik, Плиты Фатимӕ. Хуссар Ирыстоны хъахъхъӕнынады министрады ӕфсӕддон городокы фӕзуаты ацыд ардбахӕрды церемони ногӕрсиддонты ӕмӕ Уӕрӕсейаг ӕфсӕддон ахуыргӕнӕндӕтты курсанттӕн.
Ӕфсӕддонтӕн арфӕ кӕнынмӕ бацыдысты сӕ хиуӕттӕ ӕмӕ республикӕйы разамынад президент Гаглойты Аланы сӕргълӕудӕй.
"Хӕст уын бавзарын макуы бахъӕуӕд, фӕлӕ тыхст рӕстӕджы цӕттӕ ут знаджы ныхмӕ ӕрлӕууын ӕмӕ уӕ райгуырӕн бӕстӕ бахъахъхъӕныныл. Уыцы арӕхстдзинад ӕмӕ тых уӕм алкӕддӕр уӕт", - загъта президент.
Курсантты номӕй ныхасы рацыд Анастасия Лапина.
"Мах ард бахордтам паддзахады раз, райгуырдӕн бӕстӕ кӕй хъахъхъӕндзыстӕм нӕ номдзыд фыдӕлтау. Курсанттӕ, мӕ зӕрдӕ уын зӕгъы амонд ӕмӕ хъӕбатырдзинад ахуыры ӕмӕ куысты", - загъта чызг.
Ард бахӕрыны церемонийы фӕстӕ уазджытӕ, кусанттӕ ӕмӕ ӕрсиддонтӕ систой иумӕйаг Кады мемориалы фарсмӕ.
Цхинвалы ард бахордтой ногӕрсиддонтӕ ӕмӕ уӕрӕсейаг ӕфсӕддон ахуыргӕнӕндӕтты курсанттӕ
© Sputnik / Natalia Airiyan