ЦХИНВАЛ, 6 сен – Sputnik, Плиты Фатимӕ. Хуссар Ирыстоны Уӕлвӕткон уавӕрты министрады зынгфӕдисонтӕ ахуыссын кодтой арт Цхинвалы Колыты Аксойы номыл аивӕдты лицейы, фехъусын кодтой Sputnik уагдоны радгӕсон службӕйы.
Цау ӕрцыд дыццӕджы ӕхсӕв, 02:08 сахатмӕ ӕввахс.
"Фӕсидтысты Уӕлвӕткон уавӕрты министрадмӕ скъолайы хӕрӕндоны фӕздӕджы тыххӕй. Цауы бынаты куыста иу къорд, уымӕн бантыст уыйтагъд ахуыссын кӕнын арт. Развӕлгъау информацимӕ гӕсгӕ, цыбыр ӕндзӕвдӕй ссыгъд уазалгӕнӕн", - загътой уагдоны.
УУМ радгӕсон службӕйы бафтыдтой, знон ма республикӕйы кӕй аиуварс кодтой ноджы дыууӕ зынгсирвӕзты - сыгъд кӕрдӕг Цхинвалы районы Тъбет ӕмӕ Уанаты хъӕуты цур.