ЦХИНВАЛ, 12 сен– Sputnik, Плиты Фатимӕ. Хуссар Ирыстоны Знауыры районы разамынд аразы суадӕттӕ районы хъӕуты, фехъусын кодта Sputnik администрацийы сӕргълӕууӕг Гобозты Алан.
Фӕстаг ӕзты республикӕйы хъӕуты басур сты суадӕттӕ, уый та бынӕттон цӕрджытӕн ӕвзӕрын кӕны стыр проблемӕтӕ нуазыны донимӕ.
"Районы тыхтӕй ацы аз сарӕзтам суадӕттӕ Паткънет, Тигъуа, Недлат ӕмӕ Убиты хъӕуты. Ныридӕгӕн куыстытӕ цӕуынц Терегуаны, уым суадон арӕзт цӕуы ног донгуырӕнӕй. Дон уадзӕм Чъорбаулы хъӕумӕ дӕр", - загъта Гобозты Алан.
Уый ма бафтыдта, ӕрӕджы районы разамынд кӕй сцалцӕг кодта Ожорайы хъӕуы Советон рӕстӕджы арӕзт суадон дӕр.
Знауыры районы администрацийы разамонӕг ма бахахх кодта, суадӕттӕ арӕзт кӕй цӕудзысты дарддӕр ӕндӕр хъӕуты дӕр.