ЦХИНВАЛ, 28 сен — Sputnik, Плиты Фатимӕ. Цӕцӕны уагъд цӕуӕг сфӕлдыстадон коллективты форум "Многонациональная Россия" уыд национ къордты аивадон къухдариуӕггӕнджыты фӕлтӕрддзинад райсыны фӕзуат, радзырдта Sputnik Паддзахадон ансамбль "Симд"-ы разамонӕг Коцты Сергей.
Йӕ ныхӕстӕм гӕсгӕ, мадзалмӕ ӕрхуыдтой культурӕйы министрты, хореографи, хор ӕмӕ оркестры аивадон къухдариуӕггӕнджыты.
"Цымыдисон уыд хъусын фӕлтӕрд спикертӕм. Уыдон дзырдтой концертон гастролон нывӕзтыл. Куыд ӕмӕ цы у растдӕр аразын, цӕмӕй хӕлд ма цӕуой авторон бартӕ ӕмӕ закӕттӕ", - загъта уый.
Уыимӕ ма форум баххуыс ис ӕмгуыстад ӕмӕ бастдзинадтӕ рауӕрӕх кӕнынӕн.
"Базонгӕ дӕн коллективты аивадон къухдариуӕгӕнджытимӕ, директортимӕ, культурӕты министртимӕ. Уый махӕн ахъаз уыдзӕн нӕ дарддӕры концертон архайды ӕмӕ гастролон куысты", - нымайы аивадон къухдариуӕггӕнӕг.
Уый ма бафиппайдта, дарддӕр дӕр цӕттӕ кӕй у ахӕм мадзӕлтты архайынмӕ.