ЦХИНВАЛ, 4 окт — Sputnik, Гæбæраты Элина. Хуссар Ирыстоны Хъæды хæдзарады управлени рахицæн кодта 1800 кубометры суг судзынæн, фехъусын кодта Sputnik уагдоны дæлхайад "Югослеспромхоз"-ы хистæр Дзабиты Валерий.
Уый бафиппайдта, фылдæр куырдиæттæ кæй райстой районтæй.
"Ленингоры районæн мах радтам 400 кубометр суг, Знаурæн — 70 кубометры бæрц, Дзауæн — 200 кубометры. Цхинвалы районæй нырма куырдиæттæ не 'рбацыд", - загъта Дзабиты Валерий.
Уый ма радзырдта, суг кӕй ракуырдтой тыхон структурæтæ дӕр, уыдоны суг хъæуы постты хъарм кæнынæн.
"Суг рахицæн кодтам Знауыры тæрхондонæн, Ленингоры музейæн. Уымæй дарддæр ма æрвылаз æххæст кæнæм Сырх дзуары миссийы куырдиат, уыдон суг уарынц æххуысхъуаг адæмыл", - бафтыдта уый.
Дзабиты Валерий ма бахахх кодта, æрвылаз судзыны суг кæй хъæуы, уыдон нымæц кӕй кæны къаддæр, уый баст у фылдæр бæрцæй уагдæттæ кæй хизынц электрохъармгæнæн системæтæм.