ЦХИНВАЛ, 16 дек – Sputnik. Хуссар Ирыстоны барадхъахъхъæнджытæ бафæдзæхстой амалиуæгдарты пиротехникон æрмæджытæ уæй кæныныл тобæйы тыххæй, хъусын кæны Мидхъуыддæгты министрады (МХМ) пресс-службæ.
МХМ кусджытæ басгæрстой столицæйы цалдæр дуканийы æмæ фехъусын кодтой сæ хицæуттæн бæрндзинады тыххæй, кæцы сæм æнхъæлмæ кæсы тобæгонд пиротехникæ ссарыны рæстæджы.
"Абон рейдты рæстæджы фехæлдтæ бæрæг не ‘рцыд. Пиротехникæйы реализацийы цаутæ сбæрæг кæныны рæстæджы, фæткхалджыты æрбаздахдзысты бæрнмæ РХИ Законы 4 пункты 1 статьямæ гæсгæ. Ссаргæ æнæзаконон продукци та райсдзысты æмæ скуынæг кæндзысты. Кæд пиротехникæ зиан æрхæсса æлхæнæджы æнæниздзинадæн, уæд уголовон бæрндзинад хæсдзæн дуканийы уæйгæнæг", - загъта фадыгон инспектор, милицийы майор Остъаты Олег.
Рейдон мадзæлттæ уагъд цæудзысты мидхъуыддæгты министры уынаффæмæ гæсгæ республикæйы территоримæ æнæлегалон пиротехникон æрмæджытæ ласын æмæ реализацийыл тобæйы фæдыл.
Уагдоны бафтыдтой, зæгъгæ, рейдтæ аххæсдзысты республикæйы районтыл æмæ адарддæр уыдзысты ногахон бæрæгбонты кæронмæ.