ЦХИНВАЛ, 28 дек — Sputnik, Плиты Фатимӕ. Хуссар Ирыстоны Ленингоры районы посёлочы ӕмӕ Цъинагары ацыд Ногазон мадзӕлттӕ. Сабитӕн схӕлар кодтой ногазон лӕвӕрттӕ, бацӕттӕ кодтой концерт. Уый тыххӕй Sputnik радзырдтой районы администрацийы пресс-службӕйы.
Фыццаг ногазон бӕрӕгбон ацыд посёлочы культурӕйы хӕдзары, ӕртыццӕджы бӕрӕгбон бахӕццӕ ис Цъинагармӕ дӕр.
"Цъинагары ногазон мадзал ацыд бӕрзонд ӕмвӕзады, уым скъолайы бындур архайы арӕхстджын кафты коллектив ӕмӕ уыдон сӕхӕдӕг архайдтой ногазон концерты. Районы разамынад сабитӕм афтид къухӕй не 'рбацыдысты. 70 сабийы бӕрц райстой ногазон лӕвӕрттӕ", - загъта пресс-службӕйы кусӕг Дудайты Донна.
Ногазон мадзӕлттӕ цӕуынц Хуссар Ирыстоны ӕппӕт районон центрты ӕмӕ хъӕуты. Столицӕйы сӕйраг наз бӕласы баконды фӕстӕ, наз бӕласы алыварс мадзӕлттӕ ацыд Дзау, Къуаиса, Ленингор ӕмӕ ӕндӕр цӕрӕн пунктты центрты.