ЦХИНВАЛ, 20 янв – Sputnik, Дзæгъиаты Олег. Цхинвалы 13 Коммунары уынгыл хиды реконструкцийы проект нывæндынц балхынцъ кæнын 2023 азы кронмæ. Хуссар Ирыстоны арæзтад, архитектурæ æмæ ЦКХ министр Зæгъойты Эдуард куыд банысан кодта, афтæмæй ныртæккæ уагъд цæуынц фундамент саразыны фæдыл куыстытæ.
"Ныртæккæ куыст цæуы хиды фундамент саразыны фæдыл. Ацы куыстыты комплекс арæзт æрцæуы, цæугæдонæн ныллæг æмвæзад куы вæййы, уæд. Уый фæдыл фундамент саразыны куыстытæ хъуамæ фæуой дыууæ мæйы дæргъы – цалынмæ мит тайын райдайа", - загъта министр.
Зæгъойты Эдуард
© Sputnik / Natalia Airiyan
Уымæй дарддæр Зæгъойты Эдуард банысан кодта, ныридæгæн кæй цæттæ кæнынц эскизон проекттæ хиды хуызы фæдыл, кæцытæ бавдисдзысты республикæйы культурæйы министрадмæ.
"Февралы мах бавдисдзыстæм эскизон хъæппæристæ культурæйы министрадмæ. Культурæйы министрады цур паддзахадон культурон-историон экспертизæйы фæдыл къамисы хайадистæй æвзæрст æрцæудзæн уыцы эскизтæй иу, уымæ гæсгæ равзардзысты æрмæджытæ æмæ куыстытæ бакæныны фадæттæ", - фехъусын кодта министр.
Зæгъойты Эдуард бафтыдта, зæгъгæ, проектмæ гæсгæ хид рауæрæх кæндзысты, райдайдзæн кусын дыууæварсон змæлд.