ЦХИНВАЛ, 9 фев – Sputnik. Хуссар Ирыстоны ахуырады министрады схорзæхджын кодтой хуыздæр социалон роликы фæдыл республикон конкурсы уæлахиздзауты æмæ призерты.
Конкурс уагъд цыд хистæркъласонты ‘хсæн, кæцытæ бавдыстой сæ куыстытæ ахæм темæтыл: "Бинонтæ æмæ сабион бонтæ", "Карджын адæм", "Хæрзаудæндзинад", "Алфæмбылай", "Сæрибар темæ".
Хуссар Иры схорзæхджын кодтой хуыздæр социалон роликы фæдыл конкурсы уæлахиздзауты
© Photo : Минобразования РЮО
Уагдоны куыд банысан кодтой, афтæмæй конкурсы нысаниуæг у æрбаздахын æхсæнады хъусдард социалон ахсджиаг темæтæ æмæ хæслæвæрдтæм.
"Ахæм конкурстæ мотиваци дæттынц фæсивæдæн саразын хисæрмагонд социалон кино æмæ социалон видео, уый руаджы уыдон райтынг кæндзысты сæ сфæлдыстадон потенциал, сфидар кæндзысты се ‘мбæстагон позици", - бахахх кодтой Ахуырады министрады.
Конкурс уагъд цыд паддзахадон комплексон программæ "Рæзгæ фæлтæры монон-фæткæвæрдон хъомылады" реализацийы фæлгæтты. Мадзалы организатор уыд республикæйы Ахуырад æмæ зонады министрад.