ЦХИНВАЛ, 14 мар — Sputnik. Коронавирусон инфекцийæ фæрынчынуæвджыты нымæц 2023 азы январæй фæстæмæ фæфылдæр, фехъусын кодта Sputnik республикæйы сæйраг санитарон дохтыр Коцты Марина.
"Къуырисæры сарæзтæуыд 54 иртæсты, уыдонæй аст равдыстой æвæрццаг фæстиуæг. Марты 13 бонмæ æдæппæт сарæзтæуыд 233 тесты, уыдонæй 38 адæймагæн сбæрæг кодтой COVID-19", - банысан кодта сæйраг санитарон дохтыр.
Уымæй дарддæр Коцты Марина банысан кодта, республикæйы сезонон низтæ – грипп æмæ КРВИ-йæ рынчынкæнынады æмвæзад фæкъаддæр ис.
"Фæкъаддæр ис КРВИ æмæ гриппæй рынчынты бадзырдты нымæц республикæйы хосгæнæн уагдæттæм. 15 азы кары онг фæрынчынуæвæг сывæллæтты иумæйаг процент уыд 53% ивгъуыд къуыри, уыдоны фылдæр хай сты горæты цæрджытæ", - загъта уый.
Фæлæ Коцты Марина банысан кодта, скъола "Альбион"-ы хицæн кълæсты фæрынчынуæвджыты нымæц схызт эпидемиологон гæрæнæй, уый фæдыл иу къуырийы карантинмæ æхгæд цæуынц æртæ къласы. Афтæ ма уый бафтыдта, зæгъгæ, æхгæд æрцæудзæн 17-æм сабидоны къорд дæр.