ЦХИНВАЛ, 15 мар – Sputnik, Гæбæраты Элина. Хуссар Ирыстоны "Дорэкспострой"-ы кусджытæ арвыстой гуманитарон æххуыс сæрмагонд æфсæддон операцийы (СÆО) зонæмæ. Куыд радзырдта Sputnik амалиуæгады директор Гæбæраты Алан, афтæмæй радзог балы æфсæддонтæ райсдзысты электрон генератор, хæдтулгæ "Нива", афтæ ма дрон æмæ хостæ.
СÆО хайад исынц Хуссар Ирыстонæй бирæ бархионтæ, афтæ ма республикæйы æмбæстæгтæ, кæцытæ цæуынц контрактон службæ уæрæсейаг 4-æм æфсæддон базæйы.
Æххуыс баластой æфсæддонтæн Хуссар Ирыстонæй, кæцытæ лæууынц Авдеевкайы бын.
"Гуманитарон æххуыс æвзаргæйæ мах бахынцыдтам æфсæддонты фæндон. Аластам хостæ, фылдæр антигистаминон буарадтæ, квадрокоптер, термостелькæтæ дзабыртæн, минералон дон "Бæгъиатæ" æмæ бирæ æндæртæ. Иууыл сæйрагдæр – хæдтулгæ, практикон æгъдауæй ног", - банысан кодта Гæбæраты Алан.
Гуманитарон æххуыс арвитынæн баххуыс кодта республикæйы сæргълæууæг Гаглойты Алан.