ЦХИНВАЛ, 13 апр – Sputnik, Плиты Фатимӕ. Хуссар Ирыстоны столицӕйы куыддӕр хур аныгъуылд, афтӕ Цхинвал бацыд адӕмон ӕгъдауы ахӕсты - алы къуымты ссыгътой ӕртытӕ.
Куадзӕны размӕ ӕгъдау ацы хатт фӕкъуыхцы кодта ӕнӕхуынд къӕвда. Ивгъуыд азты уӕлдай ныр централон уынгтӕ рацух сты ритуалон артытӕй, фӕлӕ горӕты кӕрӕтты фыдбылызсурӕг артӕй цух нӕ уыд Цхинвал.
"Хъӕуы-иу цӕхӕрадоны бырон басыгътам ацы бон, йӕ фӕнык та йын пырх кодтам зайӕгой садзын кӕм хъавыдыстӕм, уыцы фадыгыл. Уыцы зӕхх иу радта иууыл хорз тыллӕг", - дзуры горӕты цӕрӕг Лиана.
Кӕд централон уынгтыл зын ссарӕн уыд артытӕ, уӕд "Шанхай"-ы микрорайоны та алы хӕдзары раз дӕр пиллон кодтой ӕхсӕдӕнтӕ ӕмӕ сугтӕ.
"Афтӕ баззад раг заманӕй, фыдбылыз сурӕг арт вӕййы абон. Ӕгъдаумӕ гӕсгӕ хъуамӕ цӕхӕрадоны сарӕзтаин арт, фӕлӕ мын сӕнӕфсиры хъыг дары. Мӕхӕдӕг ма ӕвзонг куы уыдтӕн, уӕд иу АТК -йӕ радавтам хӕдтулгӕты цӕлхытӕ ӕмӕ иу дыууӕ бон дӕр нӕ нымӕг кодта нӕ арт. Ныр сабиты ахӕмӕй ницыуал цымыдис кӕны",- загъта бынӕттон цӕрӕг Геннадий.
Горӕты иууыл стырдӕр арт скодтой Мамсырайы фырты уынгыл, уыдон самал кодтой зӕронд хъӕдын дуӕрттӕ ӕмӕ рудзгуытӕ.
Цхинвалы банысан кодтой Артгӕнӕнтӕ
© Photo : Natalia Airiyan