ЦХИНВАЛ, 13 апр – Sputnik, Гæбæраты Элина. Цхинвалы Куадзæнмæ æфснайынц Згъудеры уæлмæрды территори. Уый тыххæй Sputnik фехъусын кодтой Цхинвалы администрацийы хæрзарæзтады дæлхайады.
"Æфснайыны куыстыты архайынц техникæйы цалдæр иуæджы æмæ хæрзарæзтад æмæ зæлдфæлындæны дæлхайады кусджыты фылдæр хай", - радзырдтой уагдоны.
Дæлхайады кусджытæ ныридæгæн раластой цалдæр уæзласæн хæдтулгæйы быронимæ.
"Æфснайыны куыстытæ адарддæр уыдзысты къуырийы кæронмæ. Куадзæнмæ алцыдæр ссыгъдæг кæндзыстæм", - загътой уагдоны.
Хуссар Ирыстоны ссис традици æфснайын сыгъдæг бынæттæ æмæ уæлмæрдтæ Куадзæны размæ. Ивгъуыд азты коммуналон службæтæн æххуыс кодтой студенттæ, æфсæддонтæ, афтæ ма инициативон къордтæ.