ЦХИНВАЛ, 20 апр – Sputnik, Гæбæраты Элина. Хуссар Ирыстоны Дзауы районы администраци сорганизаци кодта уалдзыгон зиу Дзауы поселочы. Районы администрацийы пресс-секретарь Тедеты Лиана куыд фехъусын кодта, афтæмæй зиуы хайад райстой хъæууон администрациты кусджытæ, афтæ ма милици æмæ рынчындоны кусджытæ.
"Фыццаджыдæр, ссыгъдæг кодтам фæзуæттæ трассæгæрон – Хуыцъейы хъæуы онг. Администрацийы сæргълæууæг Тыбылты Ванда йæхæдæг дæр активон хайад райста зиуы æмæ фидарæй загъта, ахæм экологон акцитæ дарддæр дæр кæй араздзысты", - радзырдта Тедеты Лиана.
Уый ма банысан кодта, тагъд рæстæджы кæй райдайдзæн пикникты сезон, æмæ уый фæдыл районы разамонæг æрсидт цæрджытæм, цæмæй улæфджытæ сæ фæстæ æфснайой бырон.
"Мах уадзæм зиутæ. Сæ куыст иттæг хорз æххæст кæнынц æфснайджытæ дæр, фæлæ не ‘мбæстæгтæ сæ фæстæ куы нæ æфснайой, уæд куыст дзæгъæлы фæуыдзæн", - хъусын кæны Тыбылты Вандайы ныхæстæ пресс-секретарь.