ЦХИНВАЛ, 5 май – Sputnik, Козаты Диана. Хуссар Ирыстоны базарадон минæвар Уæрæсейы Таймураз Гогинов банымдата æнтыстджыныл республикæйы хайадист фыццаг Кавказаг инвестицион равдысты.
Фыццаг Кавказаг инвестицион равдыст ацыд 2023 азы 3 – 4 майы Минводты Йæ продукци дзы бавдыста Хуссар Ирыстон дæр. Форумы хайадисджытæн бавдыстой сæндуцæн "Иронсæн" æмæ бæгæныйы завод "Высокогорная кельская пивоварня"-йы продукци. Афтæ ма сæ продукци бавдыстой мыд, соустæ, нозт æмæ сувениртæ уадзыны амалиуæггæнджытæ.
"Махæн уыд егъау делегаци, йæ сæргъ лæууыд Гаглойты Алан. Уагъд цыд интенсивон куыст, уыд дзы бирæ дыууæварсон фембæлдтæ Уæрæсейы субъектты сæргълæуджытимæ. Мах сын радзырдтам нæ потенциал, æрдзон ресурстæ æмæ зынаргъ дурты мыггæгты тыххæй. Иумæйагæй сисгæйæ мах райстам иттæг хорз фæстиуджытæ", - радзырдта Гогинов.
Кавказаг инвестицион равдыст
© Photo : Пресс-служба Правительства РЮО
Йæ ныхæстæм гæсгæ, равдыст бабæрæг кодтой æртæ минæй фылдæр адæймаджы – алыгъуызон æмвæзады профессионалтæ, бизнесментæ, кæцыты цымыдис кодтой инвестицитæ Хуссар Ирыстонмæ.
Хуссар Ирыстоны стенд бабæрæг кодта Уæрæсейы хицауады сæрдар Михаил Мишустин дæр. Гогиновы ныхæстæм гæсгæ, премьер йæ цæст иууы фылдæр æрдардта зынаргъ дурты мыггæгтæм, кæцыты фæсауæрц ис Хуссар Ирыстоны.
Базарадон минæвар ма бафтыдта, равдысты фæлгæтты кæй сæххæст кодтой дзырдæй бадзырдтæ, бирæты бафæндыд фылдæр базонын Хуссар Ирыстоны тыххæй æмæ дзы æрцæуын балцы. Уымæй дарддæр, кæцыдæр хайадисджыты цымыдис кодта республикæйы хъалонты фæдыл информаци.
Кавказаг инвестицион равдыст
© Photo : Пресс-служба Правительства РЮО