ЦХИНВАЛ, 17 май - Sputnik. Цхинвалы скъола-интернаты проблемæтæ скъуыддзаг цæудзысты этаптæм гæсгæ приоритетон здæхты, фехъусын кодта Хуссар Ирыстоны хицауады сæрдар Джуссойты Константин ахуырадон уагдонмæ балцы рæстæджы, хъусын кæны хицауады пресс-службæ.
Джуссойты Константин ахуырад æмæ зонады министр Лолаты Аслан æмæ интернаты директор Сланты Эллаимæ басгæрста хæрæндон, спортзал, актон зал æмæ ахуырадон кълæстæ, æрныхас кодта ахуыргæнджытимæ, базонгæ йæ кодтой проблемæтимæ.
Директор йæ хъус æрдардта хæрæндоны куысты уавæртæм, кæцытæ дзуапп нæ дæттынц санитарон-эпидемиологон нормæты домæнтæн. Афтæ ма уый бафтыдта, зæгъгæ, скъолайы хъæуы ног зынгсирвæзтты ныхмæ системæ. Премьер банысан кодта ацы хæслæвæрдты ахсджиагдзинад æмæ фидарæй загъта, этаптæм гæсгæ сæ кæй аскъуыддзаг кæндзысты.
Джуссойты Константин бабæрæг кодта Цхинвалы скъола-интернат
© Photo : Пресс-служба правительства Южной Осетии
"Мæн мæхи фæндыд фенын скъола-интернаты куыст, басгарын æнæмæнгхъæугæ ифтонгад уагдоны штатон куыст æнæкъуыхцыйæ æххæст кæнынæн. Æз уынын, куыст кæй цæуы, фæлæ сывæллæттæ хъуамæ хъомыл кæной комфортондæр уавæрты", - загъта Джуссойты Константин.
Интернаты директор ма банысан кодта, бæстыхайы уавæртæ кæй нæй коррекцион кълæстæн, хæрзарæзтад домы скъолайы территори дæр, уый нымæцы сывæллæтты фæзуат.
Джуссойты Константин бабæрæг кодта Цхинвалы скъола-интернат
© Photo : Пресс-служба правительства Южной Осетии