ЦХИНВАЛ, 5 июн — Sputnik, Дзæгъиаты Олег. Хуссар Ирыстоны президент Гаглойты Алан фехъусын кодта, Тедеты Вадимы къухдариуæгады бын Хуссар Ирыстоны паддзахадон университетæн (ХИПУ) ис зынгæ æнтыстытæ æмæ йын банхъардта йæ кандидатурæ университеты ректоры æвзæрстытæм.
Къуырисæры ХИПУ ректор Тедеты Вадим бавдыста хыгъдлæвæрд архайды фæстиуджыты тыххæй 10 азмæ. Мадзалы хайад иста паддзахады сæргълæууæг Гаглойты Алан, президенты администрацийы разамонæг Джиоты Алан, афтæ ма ХИПУ зонадон советы уæнгтæ.
"Уæрæсейы Федерацийы раззагон университеттимæ дарддæры æмгуыстад хынцгæйæ, ХИПУ къухдариуæгады куыстæн аргъ кæнгæйæ, кæд нæй ныхдуртæ законады 'рдыгæй, уæд æз рекомендаци кæнын раразмæ кæнын Тедеты Вадимы кандидатурæ ректоры бынатмæ", - банысан кодта президент.
Архайгæ ректорæн бузныджы ныхæстæ загътой Зонадон советы уæнгтæ, уыдон банысан кодтой, алкæцы аз дæр ахуырадон процесс хуыздæр кæны.
Тедеты Вадим бузныг загъта Зонадон совет æмæ республикæйы къухдариуæгадæн æууæнчы тыххæй æмæ равдыста цæттæдзинад ректоры бынатмæ æвзæрстыты хайад райсынмæ.
ХИПУ ректоры æвзæрстытæ ацæудзысты 6 июлы.