ЦХИНВАЛ, 8 июн — Sputnik, Гæбæраты Элина. Ленингоры районы Цъинагары хъæуы Культурæйы хæдзары хореографион ансамбль "Арвырон" Гуссоты Ласкъойы къухдариуæгады бын ацыд сывæллæтты, æрыгæтты æмæ хистæрты сфæлдыстады дыккаг æхсæнадæмон конкурс "Жемчужина Черноморья"-мæ, кæцы ацæудзæн горæт Сочийы. Уый тыххæй Sputnik-æн фехъусын кодта районы администрацийы пресс-службæйы хистæр Кокойты Анжела.
"Сочийы кæсджытæн æвзонг артисттæ бавдисдзысты цыппар кафты: зилгæ кафт, хонгæ кафт, æнæкъуысгæ кафт æмæ экспромт", - загъта Кокойты Анжела.
Балц организаци æрцыд Ленингоры районы администрацийы сæргълæууæг Гæджиты Иларионы æххуысæй. Пресс-секретары ныхæстæм гæсгæ, фæндагон хæрдзтæн фæрæзтæ æрæмбырд кодтой кафджыты ныййарджытæ дæр.
"Фæндагыл фæсивæдимæ уыдзæн Ленингоры районы культурæйы хайады хистæр Жанна Епифанова, медицинон кусæг æмæ ПАИ кусджытæ", - банысан кодта Кокойты Анжела.
Уый размæ ансамбль "Арвырон" ссис Гран-при йы хицау æмæ фыццаг къæпхæны лауреат Æхсæнадæмон конкурсы "Сказочный Домбай".