ЦХИНВАЛ, 23 июн – Sputnik, Дзæгъиаты Олег. Ирыстойнаг спортсменкæ Кæсæбиты Алина рамбылдта сыгъзæрин майдан Уæрæсейы чемпионаты уæгъдибар хъæбысхæстæй Каспийскы.
Кæсæбиты Алина архайдта 62 килограммы уæзы категорийы. Финалон тохы уый æмгъуыдæй раздæр фæуæлахиз Татарстаны минæвар Светлана Липатовыйыл 11:0 хыгъдыл.
Уымæй дарддæр Уæрæсейы чемпионаты сыгъзæрин майдан рамбылдта Уалыты Чермен 74 килограммы уæзы категорийы. Бронзæйон призертæ ссисты ноджы дыууæ ирон хъæбысæйхæцæджы – Байаты Давид (74 кг) æмæ Хæдæрцаты Алик (61 кг).