ЦХИНВАЛ, 21 июл - Sputnik, Гæбæраты Элина. Хуссар Ирыстоны Хъахъхъæнынады министрады офицертæ сыгъдæг кæнынц Цхинвалы районы Хеиты хъæуы цур астæуккаг æнусы моладзандоны комплексы территори æмæ уникалон суадон, кæцыйæн, фыдæлты таурæгътæм гæсгæ, ис хосгæнæн миниуджытæ. Хъахъхъæнынады министры æххуысгæнæг Тыджыты Алан куыд радзырдта Sputnik-æн, афтæмæй куыстытæ уагъд цæуынц республикæйы президент Гаглойты Аланы фæдзæхстмæ гæсгæ.
Уый банысан кодта, дыууæ къуырийы дæргъы министрады кусджытæ кæй архайынц историйы цыртдзæвæны хæрзарæзтадыл. Уыцы рæстæгмæ уыдон ссыгъдæг кодтой къутæртæй фæндаг æмæ суадон, банысан кодта Тыджыты Алан.
"Дарддæр сыгъдæг кæндзыстæм моладзандоны территори. Куыст нын нырма бирæ ис. Моландзандоны куыстытæ куы фæуæм, уæд ацæудзыстæм бæрзæнд "Паук"-ы районмæ", - загъта Тыджыты Алан.
Уый ма æрсидт цæрджытæм, цæмæй сæ фæстæ æфснайой æмæ бахъахъхъæной республикæйы фендтаг бынæттæ.
Уый размæ аналогион куыстытæ уагъд цыдысты Цхинвалы районы Хеиты хъæуы XVIII æнусы фидары территорийыл. Ацы ран куыстытæ уагътой Паддзахадон унитарон куыстуат "Капиталон арæзтады фæткдаруат"-ы кусджытæ.