ЦХИНВАЛ, 21 июл - Sputnik. Беслæны нывæндынц саразын медицинон реабилитацийы бирæпрофилон центр, хъусын кæны Цæгат Ирыстоны сæргълæууæг æмæ хицауады пресс-службæ.
Проектмæ гæсгæ, центры уыдзæн 100 стационарон хуыссæн бынаты æмæ боныгон стационары 11 хуыссæн бынаты.
"Центры сконды уыдзысты травмотологи, ортопеди, неврологи, реанимаци æмæ интенсивон терапи, реабилитаци, пассивон æмæ активон кинезотерапи, клиникон психологи æмæ коррекцион педагогикæйы хайадтæ, афтæ ма дзы уыдзæн бассейн дæр", - дзырдæуы хъусинаджы.
Алкæцы хайады дæр уыдзæн нырыккон функционалон реабилитацион ифтонггарз.
Æнæниздзинад хъахъхъæнынады ног уагдон, кæцыйæн нæй аналогтæ регионы, фæзындзæн Цæгат Ирыстоны дыууæ азы фæстæ.