ЦХИНВАЛ, 4 авг – Sputnik, Дзæгъиаты Олег. Хуссар Ирыстоны сорганизаци кæндзысты æнæпрофессионалон футболон лигæ "Фыранк". Турниры, кæцыйы организатортæ сты республикæйы æхсæнадон архайджытæ æмæ футбол уарзджытæ, командæты сконды уыдзæн фæйнæ 8 хъазæджы.
Ныртæккæ командæтæ дæттынц куырдиæттæ турниры хайад райсынмæ. Лигæйы хайад райсыны фадат ис алкæмæндæр 16 азы карæй хистæрдæр.
Турнир нывæндынц райдайын сентябры кæрæтты. Æнæпрофессионалон лигæ уагъд цæудзæн зылдон системæйы æрвыл улæфт бонты.
Турниры организатортæй иу, æхсæнадон архайæг Дзигойты Роберт куыд банысан кодта, афтæмæй лигæйы сæйраг нысан у футболы райрæзт Хуссар Ирыстоны.
"Бæрæггонд у, футбол кæй у иууыл популярондæр спорты хуыз æрмæст Хуссар Ирыстоны нæ, фæлæ æппæт дунейы. Махмæ республикæйы ис футболы бирæнымæц уарзджытæ, фæлæ, хъыгагæн, регулярон турниртæ махмæ уагъд нæ цæуы. Уый фæдыл нæ фæнды сорганизаци кæнын ахæм турнир æмæ æрбаздахын республикæйы цæрджыты", - загъта уый.
Æхсæнадон архайæг Тедеты Азæмæт бахахх кодта, турнир кæй нывæндынц саразын æрвылазон.
"Мах цымыдис кæны, куыд нын рауайдзæн алцыдæр. Ныфс нæ ис, турниры хайад кæй райсдзысты бирæ командæтæ", - банысан кодта уый.
Æнæпрофессионалон футболон лигæйы призон фонд арæзт цæудзæн хайадисæг командæты фиддонтæй. Турниры сæйраг приз уыдзæн Кубок, кæцы алы аз дæр хиздзæн ног уæлахиздзаумæ.