ЦХИНВАЛ, 31 авг - Sputnik. Ветеринари у Хуссар Ирыстоны агроcæудæджерадон комплексы иууыл ахсджиагдæр здæхт, ис ын стыр бынат паддзахады хъæууон хæдзарады æмæ паддзахады хæлцадон æдасдзинадæй ифтонг кæныны хъуыддаджы, загъта президент Гаглойты Алан йæ арфæйы ныхасы Ветеринарон кусæджы боны цытæн, хъусын кæны республикæйы сæргълæууæджы пресс-службæ.
"Æрвылбон фадыджы кусджытæ кæнынц активон архайд цæрæгойты æнæниздзинад профилактикæ, низты парахат ма ᾿руадзын, тæссаг зонæты оперативонæй архайгæйæ. Сымахыл баст у хæдзарон, хъæууонхæдзарадон æмæ амалиуæгадон цæрæгойты æнæниздзинад, цæрæгойон хæлцады хæрзгъæддзинад æмæ æдасдзинад", - дзырдæуы президенты арфæйы ныхасы.
Гаглойты Алан бахахх кодта, фадыджы кусджыты профессионализм, фæлтæрддзинад æмæ зонындзинæдты фæрцы Хуссар Ирыстон тæссаг инфекцитæй у хызт.
"Уæлдай нысаниуæг ис арæнгæроны æмæ таможнæйы ветеринарон контролæн, уый фæрцы Хуссар Ирыстоны территорийы эпидемитæ апарахат кæнынæй хызт у", - банысан кодта президент.
Республикæйы сæргълæууæг равдыста фидар уырнындзинад, хуссарирыстойнаг ветеринартæ дарддæр дæр кæй кусдзысты æнтысджынæй сæ хæслæвæрдтæ скъуыддзаггæнгæйæ.