ЦХИНВАЛ, 9 окт – Sputnik, Дзӕгъиаты Олег. Цхинвалы культурӕйы Хӕдзары хуыцаубоны ацыд эстрадон зарӕджы III Республикон фестиваль-конкурс "Голоса Осетии".
Дыууынӕй фылдӕр конкурсанты Хуссар Ирыстоны столицӕ ӕмӕ районтӕй архайдтой ӕртӕ номинацийы - "Сӕрмагонд ӕххӕстгӕнӕг", "Вокалон къорд" ӕмӕ "Вокалон-инструменталон ансамбль".
Конкурсанттӕн аргъ кодта компетентон жюри, кӕцыйы сконды уыдысты республикӕйы культурӕйы ирд архайджытӕ.
Конкурсы хатдзӕгтӕм гӕсгӕ иууыл хуыздӕр вокалон-инструменталон ансамбль ссис столицӕйы гимнази "Альбион"-ы ахуырдзауты коллектив. Ацы скъолайы ахуыргӕнинӕгтӕ ссисты уӕлахиздзаутӕ "Вокалон къорд" номинацийы дӕр. Иууыл хуыздӕр сӕрмагонд ӕххӕстгӕнджытӕй жюри банымадта Коцты Белла ӕмӕ Къӕбулты Аннайы.
Эстрадон зарӕджы III Республикон фестиваль-конкурс "Голоса Осетии"-йы уӕлахиздзаутӕ ӕмӕ призерты схорзӕхджын кодтой дипломтӕ ӕмӕ призтӕй. Мадзалы организатор уыд Хуссар Ирыстоны Культурӕйы министрады ӕвджид адӕмон сфӕлдыстады Республикон центр.