ЦХИНВАЛ, 3 ноя – Sputnik, Плиты Фатимӕ. Цхинвалы дыккаг бон цӕуынц аивадон хӕдархайгӕ коллективты ралӕудтӕ.
Цыппӕрӕмы Паддзахадон киноконцертон зал "Чермен"-ы сценӕ лӕвӕрд ӕрцыд Ленингор ӕмӕ Дзауы районы коллективтӕ ӕмӕ зарӕггӕнджытӕн. Бон раздӕр сӕ арӕхстдзинад ӕвдыстой республикӕйы столицӕ ӕмӕ Цхинвал ӕмӕ Знауыры районтӕ. Сфӕлдыстадон къордты ралӕудтӕн аргъ кӕнынц жюрийы уӕнгтӕ Культурӕйы министрады кусджыты скондӕй.
Фыццаг уал концерт равдыстой Ленингоры районы минӕвӕрттӕ. Сахаты бӕрц сфӕлдыстадон коллективтӕ равдыстой кафт, зард ӕмӕ инструменттыл цӕгъдыны номыртӕ. Уый фӕстӕ рацыд Дзауы районы рад. Уыдон бацӕттӕ кодтой 12 номыры.
"Алкӕцы хаххыл дӕр бацӕттӕ кодтам номыр. Абон архайынц азы дӕргъы куыст кӕимӕ цыд, уыдон. Профессионалон артисттӕ мах нӕ ракодтам", - загъта Дзауы районы культурӕйы хайады хистӕр Санахъоты Анжела.
Ӕрвылазон равдыстты нысан у республикӕйы культурӕйы хайадтӕ ӕмӕ хъӕууон клубты куыстӕн саргъ кӕнын.