ЦХИНВАЛ, 6 ноя – Sputnik, Плиты Фатима. Спортивон комплекс "Олимп"-ы Цхинвалы схорзæхджын кодтой Карабинæй практикон æхсынæй æхсæнадæмон турниры уæлахиздзауты. Цытджын церемони ацыд хуыцаубоны изæры.
Мадзалы хайад райста президенты æххуысгæнæг Уанеты Владимир, хъахъхъæнынады министрад æмæ фæсивæдон политикæ æмæ спорты комитеты минæвæрттæ.
Фондзбонон ерысты фæстиуджытæм гæсгæ бæрæггонд æрцыдысты карабинæй практикон æхсыны æмæ Хуссар Ирыстоны президенты Кубокыл карабинæй практикон æхсыны уæлахиздзатæ – æмткæй схорзæхджын кодтой 18 хæрзиуджыты комплектæй.
Ерыстæ ацыдысты микрорайон "Цæгаттаг"-ы сæрмæ æрзилæн фæндаджы территорийыл æмæ дих уыдысты æртæ æмвæзадыл.
Æхсæнадæмон турниры райстой хайад Хуссар Ирыстон, Уæрæсе, Абхаз, Казахстан, Кыргызстан, Молдави, Швейцари, Канада, Узбекистан æмæ Таджикистанæй минæвæрттæ. Уыдонæй аст уыдысты фæсивæд-чызджытæ.