ЦХИНВАЛ, 13 ноя — Sputnik, Плиты Фатимæ. Цхинвалы дыццæджы паддзахадон киноконцертон зал "Чермен"-ы ацæудзæн киноныв "Чемпион мира"-йы æнæкоммерцион равдыст, фехъусын кодта Sputnik шахматты федерацийы разамонæг Саулохты Георгий.
Равдыст арæзт цæуы шахматты федераци, Россотрудничествойы минæварад æмæ Культурæйы министрады хъæппæрисæй.
"Киноныв "Чемпион мира"-йы æнæкоммерцион гом равдыст ацæудзæн дыццæджы фондз сахатыл ПККЗ "Чермен"-ы. Фильм нывонд у дыууæ номдзыд шахматист Анатолий Карпов æмæ Виктор Корчновы ныхмæлæудæн, уымæй дарддæр ма дзы æвдыст цæуы райгуырæн бæстæмæ уарзондзинад дæр", - загъта Саулохты Георгий.
Дæргъвæтин фæстиаты фæстæ куыст сног кодта ПККЗ "Чермен", ивгъуыд къуыри дзы фыццаг хатт равдыстой мультфильм, ныр фенын кæндзысты киноныв.